Kassenbandwarentrenngeschichte
Wieso tuet sie jetzt dä Warätränner nöd vor ihres Züg?
Isches unhöflich, wenn ich jetzt de Warätränner anelegge?
Ich machs eifach.
Sorry.
Mann bin ich unhöflich.
ABER SIE HETTEN DOCH AU CHÖNE ANELEGGE!
Es tuet mer so leid.
Ich han nöd wele unhöflich sii. Sorry.
Ich han eifach igendwie Angscht gha, dassi ihri Rüebli au no muess zahle.
Ich verdien echt nöd viel i mim Job.
Cha doch nöd no Lüt uf Rüebli ilade.
Fucking Bio-Rüebli erst rächt nöd.
Klar, ja, s’Schlimmste wo hett chöne passiere wär gsi, dassi mi muess erkläre und Kassiererin das hett wieder müesse usenandbeinle.
Trotzdem. Ich bin eifach nöd bereit fü son Scheiss grad.
Es isch halbi sächsi. Und ich wott hei. Kei Ziit für Wort.
Drum es Zeiche setze.
Warätränner.
Mis Gebiet, dis Gebiet.
Da isch d’Gränze.
Tänk nöd mal dra, du Fuz!
Republic of My Stuff!
Land of Mis Ding!
This is Sparta!
This is Migros!
«Nei han kei Cumulus.»
Sit 1997 nöd. Wos d’Migros damals igfüehrt hät.
Das sind 18 Jahr. Mal 52 Wuche. Mal ca. 3 Mal ide Wuche go poschte.
Git genau 2808 Mal:
«Nei, ich han kei Cumulus.»
Klar, ich hett mit dä verpasste CHF 1400.-
Cumuluspünkt ihri Rüebli chöne zahle. Aber trotzdem
Frühlingsgedicht
Der Frühling scheint
Die Kleider knapp
Der Winter weint
Endlich, hau ab.
Die Bienen blühn
Die Blumen fliegen
Die Wiesen grün
drauf Kiffer liegen.
Und fliegen. In Sphären. Voll Ähren. Aus, ähm, Smarties.
Thomas ist fünfzehn
im Kopf nur Watte
versteckt vor Madlen
die riesen… Liebe.
Naturduft reich
werd trotzdem bleich
denn auch im Denner
riecht stark der Penner.
Der Bart er weht
vom Fixiewind
Der Hipster geht
ins Tibits gschwind.
Hormongeritten
flanieren Schnitten
hübsch, unbestritten
mit grossen…
beruflichen Ambitionen.
McFeel
Ich hadi gfrögt. Eifach de Börger? Nöd mit Menü?
Denn dini Antwort. Has nöd chöne glaube.
Han nomal müesse frögä.
Aber du häsch wükli nu dä Burger welle.
Zwei schiibe Brot. Ei schiibe Fleisch. Einsam.
Inere Wält ohni Pomfrit. Ohni Getränk
Du hettsch alles chöne ha. Und ich has nöd verstande.
Dä Priisunterschied, er wär so fucking nichtig gsi! WERUM!
Denn hanis checkt. Du wottsch dini Wält so.
Häsch dich entschiede.
Ich länk mi ab. Mach Chicken Nuggets. Burger brötle. Versueche z’vergässe. Singe ide Chuchi Lieder.
Aber es sind Lieder us Träne.
Mache sogar Happy Meals… und muess ob dä Ironie lache.
Klar. Ich muesses akzeptiere.
Akzeptiere, dass du dis Glück ganz bewusst ablehnsch.
Dich vo dine Ängscht leite lahsch.
Ängscht vor Pomfrit. Ängscht vor Goggi. Ängscht vorem Glück.
Angscht vorem Frölein fucking Zuekunft herself.
Drum nimm din jämmerliche Burger. Uf din Wäg.
Es isch nöd mine.
Dä Wäg.
Und ich wünsch dir nur s’Beschte. Mit dim truurige Burger.
Han dich gärn.
Söttsch dich je umentscheide.
Für Pomfrit. Für Getränk. Fürs ganze Menü.
Ich bin immer für dich da.
Au EC isch easy. Nämemer.